Тимур 12 ёшидан бошлаб бокс билан шуғулланади. Андижондаги республика олимпия ўринбосарлари билим юртида таникли мураббийлар - Марс Қўчқоров ва Александр Размаховдан бокс сирларини ўрганди, шу билан бирга етакчи боксчилар билан беллашди. Қисқа давр ичида, у 54 килограмм вазн тоифасида мамлакатимизда етакчи боксчи эканлигини намойиш этди.

Тимур Туляков 1995 йили Тошкентда ўтказилган Марказий Осиё ўйинларида кумуш, Осиё чемпионатида бронза медали билан такдирланди. 1997 йилда Малайзия пойтахти Куала-Лумпурда бўлган Осиё чемпионатида кумуш медалини қўлга киритди.

Айниқса, 1998 йил Тимур учун омадли келди. У Нью-Йоркда ташкил этилган Яхши ният ўйинларида катта ютуққа эришди ва дунё бокс мутахассисларини ҳайратга солди. Чунки у чорак финалда россиялик жаҳон чемпиони Малахбековни, ярим финалда АҚШнинг иқтидорли боксчиси Родригесни, финалда кубалик жаҳон чемпиони Фонтни мағлуб этди. Ўша йили Осиё ўйинларида қўли жароҳатланган бўлишига қарамай яна финалга чикди.

Финал учрашувининг дастлабки икки раундида рақибидан устун эканлигини яққол намойиш қилди. Бироқ янада оғирроқ жароҳатларни олдини олиш мақсадида мураббийлар "жанг"ни тўхтатишди.

Кейинги 1999 йили Тимур Туляков мамлакат чемпионати шоҳсупасидаги фахрли иккинчи ўринга кўтарилди.