Ушбу бўлимда абитуриентлар учун қириш имтиҳонлар ўтказилиш бўйича тўлиқ қўрсатма тақдим этилган. Тақдим этилган маълумотлар видео ва текст форматларида мавжуд.

• Саволлар китоби ва жавоблар варағини олгандан сўнг, жавоблар варағи варианти билан саволлар китоби варианти мослигини ҳар бир фан бўйича синчиклаб текшириб чиқади. Саволлар китобининг фанлар бўйича тест топшириқларида типографик хато ёки бошқа сабабларга кўра тўла нашр қилинмаган ўринлар ёки бетлар ва шунга ўхшаш хатолар бўлса, дарҳол аудитория раҳбарига хабар беради ва нуқсонсиз тест саволлари китоби ҳамда жавоблар варағини олади (агар абитуриент соат 9.00 гача саволлар китобидаги нуқсонлар ҳақида аудитория раҳбарига хабар бермаса, унинг мурожаати қабул қилинмайди).
• Саволлар китобининг тегишли жойига ўз фамилияси, исми ва отасининг исмини ёзиб, имзо қўяди. Абитуриент саволлар китоби ва жавоблар варағининг “Абитуриентлар диққатига” қисмини ўқиб чиқиши ва белгиланган қоидаларни бажариши шарт.
• Жавоблар варағини тўлдиришда абитуриент фақат кўк (ҳаворанг) пастали шарикли ручкадан фойдаланади. Фломастер, сиёҳли авторучка ва гелли  ручкалардан фойдаланиш ман этилади.
• Абитуриент ўзи ҳақидаги маълумотларни жавоблар варағининг тегишли қисмига титул варағидан кўчириб ёзади ва имзо қўяди.
• Жавоблар варағи рақамини титул варағи ва рухсатномасидаги мос катакларга кўчириб ёзади.
• Паспорти серияси ва рақамини, махсус кодини, таълим муассасаси кодини ва танлов кодини жавоблар варағининг мос жойларига титул варағидан кўчиради ва доирачаларни мос равишда бўяйди.
• Титул варағи ва рухсатномасига аудитория раҳбари ва кузатувчиларини фамилияси, исми ва отасининг исмини ёзув тахтасидан (доска) кўчириб ёзади.
• Ҳар бир фан бўйича жавобларни мос равишда ўз жойига белгилайди. Чет тили бўйича тест топшираётган абитуриент мос келган тилга тегишли доирачани бўяши шарт.
• Ҳар бир тест топшириғига фақат битта жавоб белгиланади. Агар битта топшириққа икки ёки ундан кўп жавоб белгиланса, ушбу топшириққа балл берилмайди.
• Жавобларни танлаш учун 108 та саволга 3 соат, 72 та саволга 2 соат вақт берилади.
• Жавобларни танлаш-ихтиёрий. Абитуриент ўзи танлаган жавобларини жавоблар варағининг тегишли блокига мос равишда кўчиради. Бунинг учун тестга ажратилган вақтдан ташқари 20 дақиқа вақт берилади.
• Тўлдирилган жавоблар варағи абитуриентнинг билим даражасини белгиловчи асосий ҳужжатдир.
• Жавоблар варағининг тўғри тўлдирилиши учун абитуриент шахсан жавобгардир.
• Жавоблар варағида тегишли доирачаларни нотўғри белгилаган, жавоблар варағини алмаштирган, фан блоклари ўрнини алмаштириб бўяган, жавоблар варағининг тегишли блокларида фамилияси, исми ва отасининг исми, таълим муассасаси коди, махсус коди, танлов коди, паспорт серияси ва рақамини ёзмаган ҳамда имзо қўймаган, титул варағига жавоблар варағи рақамларини ёзмаган ёки ундаги рақамларни бўяган абитуриентларнинг эътирози кўриб чиқилмайди.
• Тест синови тугагунга қадар абитуриентларнинг аудиториядан чиқиши тақиқланади. Аудиториядан чиққан абитуриентлар қайтадан тест синовларига қўйилмайди.
• Тест синовларига абитуриент микрокалькулятор, луғат, жадвал, китоб, уяли телефон, алоқа воситалари ва шпаргалкалар олиб кирган бўлса, тест жараёни давомида тест материалларини бошқа абитуриентга узатса, абитуриентларга ёрдам берса ва шу каби салбий ҳолларда абитуриент тест синовларини ўтказиш тартибини бузган ҳисобланади ва далолатнома тузилиб, у тест синовидан четлаштирилади.
• Тест синовини белгиланган муддатдан олдин тугатган абитуриент саволлар китоби, жавоблар варағи ва титул варағини аудитория раҳбарига топширади, абитуриентлар рўйхатидаги ўз фамилияси тўғрисига тестни тугатган вақтини ёзади ва ўз жойига бориб ўтиради. Агар у бошқа абитуриентларга ёрдам берса ёки уларнинг ишлашига халақит берса, унга ҳам тест синовидан четлаштириш ҳақида далолатнома тузилади ва далолатнома жавоблар варағига елимланади.
• Абитуриентлар аудиторияда тест синовларини топшириш қоидалари бузилганлиги тўғрисида аудитория раҳбари ва кузатувчисига мурожаат қилишлари мумкин.
• Абитуриент томонидан саволлар китоби варағи йиртиб олинганлиги аниқланса, тест синовларини топшириш қоидалари бузилган ҳисобланади ва тест синовидан четлаштирилади. Ушбу ҳақда далолатнома тузилиб, жавоблар варағига елимланади.
• Тест синовидан четлаштирилганларнинг жавоблар варағи ўқилмайди ва унга балл берилмайди.
• Абитуриент жавоблар варағининг тегишли жойини бўяш билан аудиториядаги тест жараёнининг боришига ўз фикрини билдириши мумкин.
• Аудитория раҳбари ва кузатувчиси тест материалларини санаб қутига жойлаштиради ва қутидаги шаклда белгиланган жойга икки абитуриент ҳам имзо қўяди.
• Ўтказилган тест синовлари бўйича фуқароларнинг мурожаатларини кўриб чиқиш мақсадида Давлат тест марказида мурожаатларни кўриш комиссияси (кейинги ўринларда - Комиссия) ташкил этилади.
• Комиссия таркибига Давлат тест марказининг масъул ходимлари ва фанлар бўйича экспертлари киритилади. Комиссиянинг таркиби Давлат тест маркази директори томонидан тасдиқланади.
• Мурожаат этувчи тест жавоблари эълон қилинган кундан бошлаб бир ой давомида Комиссияга ёзма равишда мурожаат қилиши мумкин. Унинг аризаси рўйхатга олинган кундан бошлаб 10 кун ичида кўриб чиқилиши лозим. ҳарбий таълим муассасалари абитуриентларининг эътирозлари ҳам таълим муассаса-ларининг абитуриентлари эътирозлари билан бир вақтда кўрилади).
• Ариза мурожаат этувчи иштирокида кўриб чиқилади. Кўриб чиқиш жараёнида мурожаат этувчининг ота-онасидан бири шахсини тасдиқловчи ҳужжатини кўрсатган ҳолда қатнашишга ҳақли. Мурожаат этувчи комиссияга паспорти ва рухсатномаси билан белгиланган куни келиши шарт.
• Аризани кўриб чиқиш жараёнида мурожаат этувчига унинг жавоблар варағи кўрсатилади ва унга тест синовида йўл қўйган нотуғри жавоблари рўйхати билан биргаликда тестда тушган саволлар китобининг нусхаси берилади.
• Мурожаатни кўриб чиқиш натижаси бўйича баённома тузилади ва Комиссия аъзолари ҳамда мурожаат этувчи томонидан имзоланади.

Комиссия хулосаси бўйича маълумот Ўзбекистон Республикаси таълим муассасаларига қабул қилиш бўйича Давлат комиссиясига тақдим этилади.

Тест синовлари учун ажратилган вақт тугагандан сўнг, аудитория раҳбари тест синови тугаганлигини расман эълон қилади. Абитуриентларнинг барча тест материаллари: саволлар китоби, жавоблар варағи ва титул варақларини аудитория раҳбари ва кузатувчиси йиғиб олади. Бу вақтда ҳамма абитуриент ўз жойида ўтиради. Тест материалларини ўз вақтида топширмаган абитуриентлар учун белгиланган тартибда далолатнома тузилади ва унинг жавоблар варағига елимланади.

Мурожаат этувчи ўз ҳуқуқларини ҳимоя қилишни сўраб бошқа давлат идораларига мурожаат қилишга ҳақли.