Бугун Республикада 59 та Олий ўқув юрти (ОЎЮ) ҳамда уларнинг 9 та филиали мавжуд. Бундан ташқари, Ўзбекистонда хорижий ОЎЮларининг 6 та филиали фаолият олиб боради. Олий ўқув юртига кириш учун ўтказиладиган тест танловида олий таълим олишни хоҳловчи академик лицей, коллеж, мактаб битирувчилари қатнашишлари мумкин. Олий таълимда давлат гранти ва тўлов-шартнома тизими асосида ўқитилади. ОЎЮларида ҳужжатлар ҳар йили 20 июндан 20 июлгача қабул қилинади. ОЎЮга қабул танлов асосида 1 августда ўтказиладиган тест синовлари натижасига кўра амалга оширилади. Абитуриентлар 3 та фан бўйича саволларга жавоб берадилар. Таълимнинг махсус йўналишларида ижодий имтиҳон ҳам топширилади.

Ҳар йили мазкур тест синовларида қатнашиш учун минглаб абитуриентлар мамлакатимизнинг ОЎЮларига ариза топширадилар. Давлат Тест Маркази (ДТМ) томонидан тақдим этилган маълумотга кўра бу йил мамлакатимиз мустақилликка эришганидан бери ушбу сон 385 645 тани ташкил этди. Президент томонидан тасдиқланган қарорга мувофиқ бу йилги квота да 385,6 мингта ҳужжат топширган абитуриентлардан 56,6 мингтаси биринчи курс талабаси бўлиш бахтига мушарраф бўлдилар. Шулардан 19,7 мингтаси давлат гранти, 36,8 мингтаси шартнома асосида таҳсил олмоқда. Бу йил магистратура курсларига 5856 та талаба қабул қилиниб, 1561 таси грант, 4295 таси тўлов-шартнома асосида таҳсил олмоқда.  

Барча ОЎЮлари ва уларнинг йўналишларининг квоталари ҳақидаги маълумотлар доимий равишда «Қабул режаси» бўлимида эълон қилиб борилади.

ДТС томонидан келтирилган маълумотга кўра бу йилги танловда Республика миқёсида бир ўринга етти одам тўғри келган. Ўтган йили бир ўринга 6 та одам тўғри келганди.

11,3 минг ўрин имтиёз асосида қабул қилинган талабаларга ажратилган. Имтиёзлар ҳақидаги маълумотлар билан қуйидаги ҳукумат қарорлари билан танишиб чиққач батафсил  билиб оласиз:  Вазирлар Маҳкамасининг №227-сонли қарори, Халқ таълими ҳамда Олий ва ўрта махсус таълим Вазирликларининг №249/130 ва №412/151 сонли қарорлари.

“Абитуриент” бўлими олий ўқув юртига кириш жараёнида абитуриентлар учун фойдали йўлланма бўла олади. Бўлимнинг “Абитуриентга эслатма” қисмида Олий ўқув юртларига йўналишлар бўйича ҳужжат топшириш жараёни билан танишасиз.

Тест вақтидаги талаблар бўлимида кириш тестлари жараёни, керакли ҳужжатлар ва жавоблар варақаси уларни тўлдириш тартиби ҳақидаги маълумотларга эга бўласиз. Маълумотлар видеолавҳа ва матн кўринишида берилган.

Бундан ташқари, фойдаланувчи керакли маълумотлар билан қисқа муддатда танишиши, керакли адабиётларни ўзига юклаб олиши, таълим курслари, хорижий олийгоҳлар ва улардаги таълим тизими ҳақидаги батафсил маълумотларга эга бўлиши мумкин..

Барча маълумотлар расмий манбалардан олинган бўлиб, ҳаққонийдир.